آلَشُقُةّ_آلَمًسِکْوٌنِةّ (2)
آلَحًلَقُةّ ~ «03»
بًقُلَمً مًحًمًدٍ بًشُريَ "αℓ-fαяєєɒ Вυsняяα"
اثناء ما بنتكلم كدا جا يارخ قال لي جدي عايزك في قاعة الاجتماعات مشيت معاهو رحب بي وقعدني جمبو بشمالو وجمبي طوالي قعد حسام وقاعد بيمينو عيقم وطبعا قاعد يحترمني احترام شديد وكل وزراؤو كمان وعيالو الا "دعبل ابو الشوكير" حسيتو ما طايقني عشان هزمت ولدو ومكرمش وشو معاي زي التقول ماضغاهو بقرة🐮🤭 المهم اتكلم الحاكم وقال عيقم حيفهمك كل حاجة ان شاء الله اتفضل ياعيقم.. ..» طبعا احنا حددنا زواجك من الاميرة ميارخ وزواجكم حيتم هنا في عالمنا وحيكون الزواج بي كامل هيبتو لانك حتتزوج اميرة مش واحدة من العوام وتاني حاجة القانون حق انو الاميرة لما تتزوج انسي لازم تنفي من ارض الجن دا احنا لغيناهو يعني اي وكت حبيت تجي تزورنا انت وزوجتك مرحبين بيك💃طوالي ابو الشوكير اعترض كيف يعني زواجو يتم هنا وبي كامل هيبتو ماحصل انسي اتزوج اميرة عندنا وغير ده مغيرين القانون عشان انسي لا كدا في تجاوزات حاصلة ياحضرة الوزير عيقم ماعشان انت بتشرع وتجيب القوانين تقوم تخت قوانين من راسك وتشيل من راسك ☹️ الضحضاح خبط الصولجان حقو بي قوة في الارض بي غضب 😠 طوالي صحبك فصلا وبقي صغير وسكت لكن بعاين لي عين حقارة وانا ولا هاميني الموضوع ،يادنيا مافيكي الانا😹،
المهم قررو انو الزواج حيكون بعد تلاتة يوم وانو ممكن اقضي شهر العسل هنا او في عالمي حسب اختياري قلتا مافي مشكلة هنا حبة وفي عالمي الباقي كمان وفعلا عدت اليومين بسرعة مع التجهيزات حقت العرس وكدا وجا اليوم التالت يوم العرس وكان القصر دا مزين زينة جد والناس جات من كل مكان وكان صراحة عرس فخم بمعني الكلمة حسيت نفسي كانك ملك بتزوج وكان العرس عملوهو في حديقة الافراح حقت القصر 😹 يلا خلوني اوصفا ليكم
{اولا حديقة كبيرة شديد وعالية مسافة متر كدا من الارض فيها درج زي كانها مسرح من المسارح البقدمو فيهو المسرحيات فيها 4 عواميد مدورة كبيرة وعالية كل واحد منها طالعة منو في الجمبات شعلات انارة زي غصن الشجرة ومرصعة بي كمية حقت زمرد وفضة كتيرة كمان والارضية من زجاج ناعم وفيها انارة جميلة وهادية من تحت القزاز يعني المكان باختصار كدا انارتو جميلة ياخ ومزربة بالجمبات بي سور فيهو زهور كتيرة من الياسمين مدي ارتفاعا متر وفي كل زهرة 🌺 انارة بتختلف عن التانية ومتزامنات مع بعض الانارة بتنور زهرة 🌺 والجمبها بتطفي شغالات بالتناوب يلا نجي لبوابة الحديقة جاية علي شكل قوز قزح نص دايرة وفيها نفس فهم السور ونفس الاضائة بس فيها زمرد ومكتوب في البوابة من برة وانت داخل الصالة "صالة افراح الاسرة المالكة" ومن جوة مكتوب "مبارك لكما زواجكما"
نجي للكوشة يلا 😂 "قلب المكان"🤭 الكوشة كرسيين واحد للعروس وواحد للعريس حق العروس مصنوع من الدهب ومرصع بمكية من الجواهر فيها الفضة والزمرد ومنقوش عليهو كتابة بالفضة مطلية في نصها بالدهب بخط جميل شديد "مبارك زواجك ايتها الاميرة الحسناء" والكرسي حق العريس نفس الشي بس دا مكتوب فيهو "مبارك زواجك ايها الفارس الاغر" وكرسي العريس مصنوع من الفضة وبدت القصة وانطلقت الالعاب النارية احتفالا بوصول الاميرة وكانت ماشاء الله اية من الجمال اية بالجد يلا وشها بيتلألأ جمالا العيون كبار الشعر طويل واسود سواد الليل "حظك يانيجيري شلبت المزة من الشوكير 😏😂🤭 " خلوني اوصف ليكم الزفاف " لابسة فستان زفاف ضنبو طويل شديد ماسكاتنو تلاتة وصيفات مرصع بي زمرد ومورد بي زهور الياسمين مشكلنها علي شكل قلب❤ ولابسة تاج 👑 فيهو ياقوت والماس وفضة والتاج من الدهب الخالص المهم انتو اتخيلوهو حاجة كدا في منتهي الجمال 😅 اما نيجيري كان لابس بدلة لونها كحلي مع قميص ابيض وجزمة سودا وكان حالق شعرو ومجيه نفسو تمام التمام يعني كان كسار بمعني الكلمة
يلا عملو العقد زي العقد حقنا بي ماذون برضو وشاهدين وولي كان وكيل العروس جدها وكيلي انا عيقم وتما العرس والحاضرين فرحو وابتهجو والاستعراضات والجن الهوائي والغواص والارضي والناري كل واحد ليهو دور وحضرو المماليك من كل مكان والمعازيم اتسبطو ماكان في عرس زيو الصراحة والناس لما عرفو اني الانسي الخلصتهم من الشوكير كلهم جو العرس وحضروهو وبقو ينظرو لي نظرة امتنان وخبر الهزيمة دا وصل كل بقاع ارض الجن اسرع من ما كنت متخيل وبعد العرس انتهي جاني عيقم قال لي تقضي عندنا التلاتة ايام الاولي بعداك ترجع عالمك تكمل شهر العسل حقك هناك قلتا ليهو موافق قام اداني خاتم وقال لي بما انك اصبحت فرد من عائلة الضحضاح فالبس الخاتم دا لانو شعار مملكتنا وبرضو فيهو حماية ليك لانك لما ترجع عالمك اسلحتك ما حتشتغل هناك لكن الخاتم دا هنا وهناك بحميك وحيكون ليك بمثابة درع 🛡 وبيحميك من اي هجوم خصوصا لو كان من الجن وتاني اداني قزازة فيها سائل احمر قال لي اشرب دي وادعي لي 😎 ......
يتبع
ليست هناك تعليقات
إرسال تعليق